देशैभरि सयपत्रीको नयाँ बहार स् आफ्नै माटोमा पसिना बगाउने युवाहरूलाई प्रोत्साहन गरौँ

यस वर्षको तिहारमा देशैभरि सयपत्री फूलको छुट्टै रौनकता र अर्थतन्त्रमा समेत सुधार देखिएको छ । गाउँदेखि शहरसम्मका युवाहरू व्यावसायिक रूपमा सयपत्री खेतीतर्फ आकर्षित भएसँगै यसपाली स्वदेशी फूलको उत्पादन उल्लेख्य रूपमा बढेको छ । कृषि पढेका प्राविधिकदेखि अध्ययन पूरा गरी आफ्नै माटोमा भविष्य खोजिरहेका युवाहरूले बाँझो जमीन, बारीका पाटा र खेतका गराहरूलाई पहेँलपुर बनाएका छन् । देशैभरि फैलिएको यो युवा जागरणले वर्षौँदेखि तिहारमा भारतीय फूल आयातमा निर्भर रहनुपर्ने बाध्यतालाई चिर्दै आत्मनिर्भरतातर्फको ठूलो बाटो खोलेको छ ।

आफ्नै देशमा पसिना बगाएर गुणस्तरीय र ताजा सयपत्री उत्पादन गर्ने यी युवा उद्यमीहरू हाम्रा वास्तविक नायक हुन् । बाहिरबाट आयात गरिएका अस्वस्थकर र महँगा प्लास्टिकका माला वा बासी फूलको साटो हाम्रै गाउँ(घरमा नेपाली युवाहरूले पसिना सिँचेर फलाएका ताजा सयपत्रीका माला प्रयोग गर्नु आजको आवश्यकता हो । आफ्नै माटोमा फुलेको प्राकृतिक फूलले घरआँगन सजाउँदा र भाइटीकामा दाजुभाइलाई पहिराउँदा त्यसको सुगन्ध, धार्मिक पवित्रता र आत्मीयता नै फरक हुन्छ ।

त्यसैले, यस तिहारमा सम्पूर्ण आम उपभोक्ता महानुभावहरूलाई प्लास्टिकका माला पूर्ण रूपमा बहिष्कार गरी “स्वदेशी फूलको प्रयोग गरौँ, आफ्नै माटो र नेपाली युवालाई समृद्ध बनाऔँ” भन्ने अभियानमा जोडिन हार्दिक आह्वान गर्दछौँ । हामीले किन्ने एक थुँगा स्थानीय सयपत्रीले हाम्रै छिमेकी युवा उद्यमीको अनुहारमा मुस्कान ल्याउँछ र देशको अर्थतन्त्रलाई बलियो बनाउँछ । आउनुहोस्, यसपालीको चाडपर्वमा आफ्नै देशका युवाको सिर्जना र पसिनाको सम्मान गर्दै मौलिक र आत्मनिर्भर तिहार मनाऔँ |